دقيقة حداد
موال دقيقة حداد
على الناس اللى كان ليهم
ضمير و صاحى و مات فيهم
دقيقة حداد
على الدنيا اللى عايشنها
و فاكرين روحنا فاهمينها
لا ليها عزيز و لا غالى
و عايشة فى برجها العالى
و لو شافت دموع إنسان برئ بتقول و انا مالى
دقيقة حداد
على الحلم اللى انا حلمته
على القلب اللى علمته
بحب فى ناس ماليها أمان و رحت بإيدى سلمته
على الحب اللى جمعنا
و خلى العمر ليه معنى
و رخصناه فى ليلة و يوم و ضاع و وراه ضعنا
على اللمة
دقيقة حداد
على الصاحب
دقيقة حداد
على اللمة و على الصاحب
و مين دلوقت يتصاحب
زمن كان الحنين غلاب
زمانا ده اللى كان غالب
على الرحمة
دقيقة حداد
على الطيبة
دقيقة حداد
على الرحمة و على الطيبة
على خوفنا من العيبة
ده حتى فى عز وقت الخير بتبقى الكلمة محسوبة
على اللى بإيدى علتهم
و كنت باحلى دنيتهم
لاقونى فى وقت أحزانهم
و وقت جراحى ما لقتهم
بنتهم و هم هدونى
شافونى فى ضعفى جرحونى
باعونى رخيص و انا الغالى و على نار هادية سوونى
دقيقة حداد
على الود اللى راح زمنه
على الناس اللى يؤتمنوا
على زمن اللى يعمل خير ما يسناش ياخد تمنه
على العشرة و على الجيرة
على النخوة و على الغيرة
على الحق اللى ضاع بينا و لا بنجيب له يوم سيرة
على نفسى
دقيقة حداد
على حالى
دقيقة حداد
على نفسى و على حالى
على دمعى اللى كان غالى
و رخصته ناس مش ناس نزلت لهم من العالى
على الضحكة
دقيقة حداد
على الفرحة
دقيقة حداد
على الضحكة اللى انا نسيتها
و راحت منى حلاوتها
على الفرحة اللى نسيتنى قتلها الحزن موتها
على العبد اللى كان راضى
و رامى تكاله على الهادى
شى لله ضيعوا الأيام و أحلى سنينه على الفاضى
بقينا ليه نقول نفسى انا و الدنيا من بعدى
و لو حد إنجرح منا نقول أهه شدة و تعدى
دقيقة حداد
على الأخ اللى يسند أخوه
على الإبن اللى يوكل أبوه
على اللى يشيل هموم الناس و يسعدهم و لو جرحوه
على القلب اللى كان إنسان
و عاشرته و غيره أمان
على الحضن اللى كان بيضم غريب و قريب فى اى مكان
على عمرى
دقيقة حداد
على قلبى
دقيقة حداد
على عمرى اللى ضاع ببلاش
على قلبى اللى ما إتهناش
رماه الحظ و نصيبه على الناس اللى ما تسواش
على سنينى
دقيقة حداد
على عينى
دقيقة حداد
على سنينى اللى مش بتمر
ما شفتش فيها لحظة تسر
على عينى اللى شافت ويل يكفيها بقية العمر
بنتقابل و لا الأغراب
بنتكلم كلام بحساب
ياما الدنيا ساهتنا و خطفت مننا الأحباب
بنضحك بس فى قلوبنا
خلاص الحزن دوبنا
وشوش ماشية ماليها الخوف و قبل اوانا شايبنا
موال دقيقة حداد
غناء :- طارق الشيخ
كلمات : - صلاح مندى
ألحان :- السيد جابر
توزيع :- تامر صقر
ليست هناك تعليقات:
إرسال تعليق