لا يوجد بطالة فى مصر

عنوان صادم بلا شك ... و لكنه الحقيقة للأسف ...
لا يوجد فى مصر شباب عاطل او لا يجد عمل ، أرجو ألا يقلق قارئى الكريم و ألا يكمل قراءة المقال فانا لم أنضم بعد للحزب الوطنى - بس و الله بافكر ! - و لم أصبح مخبر فى أمن الدولة و لم يتم ترشيحى بعد لمنصب رئيس تحرير احدى الصحف القومية ، انا باكلم بجد مافيش بطالة فى مصر بالمعنى المتدوال و الساخر بأن الشباب قاعد على القهاوى اللى بيقول كده مغرض و حاقد على الشباب احنا الشباب - من التخرج و حتى الـ 30 و يمكن بعد - مطحونين و طالع عين اللى خلفونا آه زينا زى كل الشعب الغلبان بس احنا الضغط علينا أعنف عكس ما يتصور البعض
إنما البطالة فى مصر بطالة مقنعة مافيش شاب ما بيشتغلش ... بس بيشتغل فى مجال مؤهله طبعا ً لأ
نتكلم عن المؤهلات العليا الأول ، طبعا ً ما فيش شاب مانفسوش يجوز - غير كده يبقى غير سوى نفسيا ً او فكريا ً - لو مش عشان طموحاته الأسرية يبقى عشان احتياجاته الفسيولوجية يا سيدى على أقل تقدير مصروف جيبه فى ايده يخرج مع اصحابه يقعد فى كافيتريا يروح سينما يشترى اللى هو عاوزه من لبس او أكل لو حد ليه فى المزز يتسرمح معاها !
المفاجأة انه بيشتغل شغلانة مش فى مجاله و بينطحن و بيضرب بالجزمة و بيتهان من أسافل البشر و بياخد ملاليم و ما بيحققش اى حاجة من اللى فاتت دى !
و عشان نكون واضحين نستعرض الشغل اللى بنشتغله معشر الشباب فى الأيام السودة دى

مندوب مبيعات
طبعا ً على رأس القائمة شباب مصر كلهم بقوا بيشتغلوا مندوبين مبيعات و مبقاش شباب التجارة ليهم فى الموضوع ده و لمت
طبعا ً كل شاب و اللى يقبله بمعنى فيه اللى يلف على القهاوى و المطاعم بولاعات و ساعات و تى شيرتات - معاكى رضا من الشركة المصرية للمبيعات ... نحن نختلف عن الآخرون خاااالص !!! - و فيه اللى ضابط الهيئة - فول فورم - كرافت و بدلة كاملة و السلعة تافهة !
و فيه العوج يقول لك ميديكال راب يعنى مندوب مبيعات أدوات و أجهزة طبية و دى متخصصة شوية لخريجين الزراعة و العلوم و البيطرى و يشترط إجادة الإنجليزية على أساس انى حابيع فى شوارع لندن او لوس أنجلوس !
و فيه الأكثر عوجا ً و يقول لك باشتغل سيلز ! يعنى بالإنجليزى فرقت !!! المحترم أكتر - بس برضه عوج - يقول لك سيلز إن دور يعنى مبيعات داخلية يعنى فى المكتب و ما بيلفش على كعوب رجليه
اما الأخوة الأطباء البشريين و الصيادلة فـمندوبين مبيعات أدوية و للى مايعرفش فأوسخ مجال فيكى يا مصر هو مجال الأدوية
فيه مجال تانى ناس كتير مصرة انه محترم و يقول لك ده بيشتغل فى الصياحة - قصدهم السياحة و لا مؤاخذة - الشغل ده اسمه تايم شير اللى ما يعرفهاش حابقى أشرحه له بعدين
الإتصالات
لأ مخك مايروحش لبعيد الإتصالات فى مصر معناها كروت الشحن و الشحن على الهوا او على الطاير - انتا و شبكتك - و الوقوف فى السنترالات 10 ساعات كحد أدنى و قد يدخل فى هذا المجال العامر تصوير المستندات و بيع مذكرات الطلبة من حضانة للجامعة !
و لو الشاب مننا مطقطق شوية - على رأى علاء ولى الدين الله يرحمه جـَوزها واحد بتاع فشار ! - يصلح موبايلات و كومبيوتر او يقوم بالموضوع العبقرى اللى اسمه تجميع الجهاز مقابل 20 جنيه للجهاز ده غير تنزيل البرامج و اشتغالات الموبايلات التى لا تنتهى
العمالة
لأ مش العمالة لدولة أجنبية لا سمح الله و لو أن التجسس على النظام الحالى يمكن يجيب فايدة و يضيعه و نخلص !
شوف هو يشغلك بمؤهلك بس تشتغل بإيديك زى العمال يعنى الإسم دكتور بيطرى فى شركة أدوية و الواقع - على رأى كتكوت مش ده الواجع مش دى الحجيجة ؟ واجع ايه ؟ واجع عليك دوار بالكنيف اللى فيه بالراجل اللى جاعد على الكنيف !!! - بتشيل و تحط فى الكراتين لحد لما يجيلك لومباجو !
الإسم محامى الواقع ( الولا اللى فى المكتب ) اللى الأستاذ الكبير مشغله حمو مشاوير يشوف الرول و ميعاد الجلسات و يشيل شنطة و روب الأستاذ و يخلص بفهلوة كل ورق المحكمة لحد لما يبقى يعرف يسجل نفسه فى النقابة و يفتح لنفسه مكتب بعد 10 لـ 15 سنة ! و يوم لما يقابل أستاذه ده حايتف على وشه !!!
الإسم اى حاجة من بتاعة السياحة و الفنادق من بتوع الأسطف الكامل و الواقع يا اما فى المطبخ بتساعد الشيف العالمى خريج معهد البولدون و تسلك له البلاعة لو اتسدت و تلم زبالة المطبخ و تطلع ترميها برة او تشتغل فى الصالة ... لأ مش متر دوتل محترم او كابتن صالة ملو هدومك انتا جنيت جت لك منين الخبرة عشان تشتغل الشغل ده انت بتوصل الزبائن للترابيزات اللى هما عاوزينها و تفتح لهم الكراسى و بعد الأكل تجيب لهم الخلات ... و فى الفنادق يمكن تشيل الشنط
الإسم مهندس زراعى الواقع ممكن لو فى مزرعة دواجن بتنضف تحت الفراخ و تشيل الــ ... لا مؤاخذة و تغير البامبرز و تنيمهم ! و نفس القصة مع البهايم بس على أفظع طبعا ً ده فى حلب كمان ! لو فى مصنع ألبان حايطق لك عرق من شيل أقساط اللبن و صفايح الجبن لو فى مصانع أغذية مش حاقول لك هنا ما بعده هنا
و الأمثلة كتير قوى و الحمد لله
الأمن
لأ برضة مخك مايروحش لبعيد مش حاتشتغل مدير مكتب وزير الداخلية اللواء شرشبيل و لا مدير أمن الجيزة اللواء النمروذ ... فرد الأمن سكيورتى لمحبى العوج ... بتختلف لو فى عمارة يبقى مهام وظيفتك الحقيقية بواب بس بشياكة بيقولوا عليك أمن ! بكااااااامل مهام البواب لو فى بنك او فى شركة فحظك أحسن بكتير و تبقى مبخت
و على كل الأحوال دى شغلانة مملة حقا ً لا تقل عن 12 ساعة يوميا ً على أساس اننا حصنة بنام و احنا واقفين !
جلابية و دقن
و ده موضوع لذيذ جدا ً انتا فى الجامعة تتعرف على حد من الجماعة السلفيين اللى اسمهم الحقيقى وهابيين و اوعى تيجى ناحية الإخوان دول سكتهم عوء و كلها مشاكل تضرب البنطلون القصير اللى يبين شرابك كله و بعد الجامعة تديها قفاطين بالصلاة على النبى ( تخيل لو حد داخل حقوق اسكندرية و لا تجارة عين شمس بقفطان !! ) ده غير طبعا ً الدقن و عود السواك و تخش فى السبوبة الجامدة ( بخور - مسواك - كتيبات دينية لكثير من الجاهلين - شرايط عمرو خالد و شلة مترزقة الفضائيات من أمثال الحوينى و المصرى و عمك يعقوب و غيرهم - مصلايات و سبح - عطور زيتية ذات رائحة فظيعة و ما بتتطلعش ! - قفاطين و الإختراع التحفة اللى اسمه إسدال و كل الحبشتكانات دى ) و تقف على الناصية يا عم بعد كل صلاة و خصوصا ً الجمعة موضوع يكسب دهب و على رأى وحيد حامد فى طيور الظلام لما راتب بيسأل إمام عن الخولى هوا بقى امتى مع الجماعة دول قاله مش عارف بس انا فاكر انه فى الكلية كان مع الشيوعيين !! بس ده لما الشيوعيين كان رزقهم واسع بس دلوقت دول اللى رزقهم أوسع
______________________________

الشباب الغلابة بقى بتوع المؤهلات المتوسطة و فوق المتوسطة للأسف و بكل أسف فى زمن لا يوجد به صناعة و لا حتى زراعة فنحن لا نحتاج لفنيين و عمال محترفة
فى عمارة يعقوبيان بيقول لها البلد دلوقت مش محتاجة مهندسيين البلد محتاجة صيع !
دول بقى بيشتغلوا سواقين و ياريت سواقين أوتوبيسات و مينى باصات و ميكرو باصات لأ حضرتك سواقين تكاتك و تريسكلات بصندوق
و ممكن برضه يبقى لهم فى سبوبة الإتصالات او الدقن و الجلابية السالف ذكرهم و بياعين فى الأسواق المختلفة و دول ربنا معاهم لأنهم فى حرب 24 ساعة فى الـ 24 ساعة مع سدنة و جنرالات المرافق و الإزالة - بالمناسبة المرافق بتفكرنى لما بقرأ فى كتب التاريخ أن جند الوالى الظالم خورشيد مثلا ً نزلوا إلى المدينة و نهبوا الأهالى بضائعهم و أشاعوا فيهم الذعر ! - ده غير اللى رمى التعليم الفنى ورا ظهره و التعليم كله و اشتغل شغل ابوه اهو يبقى بر والدين و شغل فى نفس الوقت نجار حلاق سباك حداد ... إلخ


ربنا يكون فى عون شبابك يا مصر


مــحــمــد يــاســر بــكــر