اعمل ايه لو مش عاوز الدولتين ؟

اخوانى ، زملائى ، جيرانى ، يا معشر المصريين ، بالله عليكم تساعدوا أخيكم الغلبان ،
انا مش عاوز الدولتين ، لا عاوز مصر تبقى علمانية و لا عاوزها تبقى دينية أعمل ايه ؟ ، انا مش عاوزها علمانية و نموذج تركى متطرف العلمانية يمنع البنات من الحجاب و يرفع الأذان بحساب و يحصر الدين جواك و يبهدل الأحوال الشخصية بالمساواة فى الميراث و اطلاق يد المرأة فى الزواج و الطلاق و يهضم حق الأبناء و الدخول و الخروج من الدين أسهل من تغيير الملابس .
و برضه مش عاوز دولة دينية و نموذج سعودى و لا ايرانى مش عاوز حد يكون عليا وصى و يتدخل فى حياتى الشخصية بدعوى إصلاحى كأنى قاصر ، يلبسنى و يأكلنى و يشربنى على مزاجه يمنع و يمنح باسم الدين أخطائه تبقى أخطاء الدين و العياذ بالله و نجاحه يبقى نجاح الدين يغير نظام البلد كلها و يقلبها فوقانى تحتانى بدعوى تطبيق الدين .
مش عاوز دولة علمانية تبقى كلبة تابعة للقوى العالمية و الكوكبية و شركات المالتى ناشيونال تجبرنى على عداء من يشاءون و مصادقة من يشاءون و مش عاوز دولة دينية بتجرى ورا حلم عبيط اسمه الخلافة و كأننا عبيد و لازم لنا سيد .
مش عاوز دولة علمانية مليانة بالخمر و العرى و التهتك بدعوى الحرية الشخصية و مش عاوز دولة دينية متزمتة تخنقنى و تقيدنى و تكبلنى و اضرب فيها لو قلت صباح الخير .
هوا انا لازم أختار ما بين أقصى اليمين و أقصى اليسار ، ماينفعش أمشى فى النص مافيش وسط ياعيش فى تركيا ياعيش فى السعودية و أفغانستان .
يا ناس ماحدش يدلنى على حزب يمشى فى النص ؟ و مرشح رئاسة لا علمانى و لا دينى ؟
أغيثونا بالله عليكم