حــســن و نــعــيــمــة

السلفيون ... براءة و لكنهم يـُستخدموا



بالرغم من تصريحات حسام ابو البخارى بوجود 302 حالة مازال جارى البحث عنها و بالرغم من تصريح أحد الملتحين فى وسائل الإعلام بأنهم لازم يولعوا فى الكنائس فلقد خرج السلفيين براءة من هذه الأزمة لأنهم ببساطة لم يحرقوا شئ او يؤذوا أحد كل ماهنالك أن هناك عفاريت تستخدمهم و على النائب العام أن يعرف من هم هؤلاء العفاريت ؟ فالسلفيون يطرحوا القضية و يشعلوا القضية و يفجروا القنبلة و يحتلوا الصورة بالكامل إعلاميا ً فتشير إليهم كل أصابع الإتهام و لكنهم لم يقوموا بالتنفيذ ، فإذا كان السلفيون من أشاروا لوجود " عبير " و أشاروا لمكانها و طلبوا تحريرها كما طلبوا من قبل مارى قسطنطين و مارى عبد الله و كاميليا شحاتة و غيرهن فهناك عفاريت و بلطجية هم من يستغلوا الحشد الجماهيرى الذى صنعه السلفيين و يقوموا بحرق الكنائس و تبادل إطلاق النار و تحويل إمبابة إلى ساحة حرب أهلية ، و بالرغم من براءة السلفيون فيجب أن نجد حلول فهناك حسب كلامهم 302 حالة اى 302 فتنة ، 302 حريقة هم لن يفعلوها و لكن هناك من سيستخدمهم و يندس بينهم و يصنع منهم فزاعة فى وسائل الإعلام ، بالعامية السلفيون " بق " و ما يقولوه " طق حنك " و الحمد لله أن أياديهم مازالت نظيفة و الصراع بينهم و بين المجتمع مازال صراعا ً فكريا ً ايدولوجيا ً و ليس صراعا ً يدويا ً تشابكيا ً .



حسن و نعيمة



" حسن و نعيمة " الفيلم الذى أخرجه بركات سنة 1959 و تحول إلى أسطورة من أساطير الحب فى السينما المصرية مقتبس عن قصة حقيقية حدثت فى الأرياف المصرية فى الربع الأول من القرن العشرين و كان التحريف الوحيد عن القصة الأصلية أن سبب رفض حسن ليس لأنه " مغنواتى " و لكن لأنه مسلم !! و نعيمة مسيحية !! هذا كل ما فى الأمر و الثورة التى حدثت فى القرية لم تحدث بالطبع لأن حسن " مغنواتى " .

آخر كابل عندنا كان عبير و ياسين عبير مسيحية أسلمت من أجل ياسين و أشهرت إسلامها منذ سبتمبر الماضى و رافعة قضية على زوجها المسيحى عشان تخلع منه عشان تكمل الصورة مدنيا ً رغم أنها دينيا ً سقط زواجها السابق بمجرد إسلامها و عيشتها مع ياسين حلال فى حلال لكن رجال الدين المسيحى – من ضمن غسيلهم لمخها أثناء إحتجازها – أن معاشرتها لياسين زنا و لأن الفتاة صعيدية من أسيوط و لأن ثقافتها بسيطة بشكل مرعب فلقد سقطت فى دائرة جهنمية بين دينين .

السلفيون تعاملوا مع الأمر من منطلق قبلى ... الشهامة العربية فلقد جاء ياسين إلى إمبابة يستنجد بهم و من المروءة الوقوف بجواره و الكنيسة تتعامل كالعادة من منطلق حياة او موت الكنيسة عندها وسواس قهرى أنها لو سابت البنات و الستات دى كدة بكرة الصبح أقباط مصر كلهم سيدخلوا الإسلام .



الدين و الحب



المشكلة لدى الطرفين إمرأة دخلت الإسلام من أجل رجل ما المشكلة ؟ فيه مشكلة المسيحيون اللى مصدعين دماغنا بالمواطنة مش عاوزين الكلام ده و الشباب القبطى الثائر مستعد يموت فدا ده .

بنت صايعة حبت واحد مسيحى و اتنصرت عشان ( ... ) إيه المشكلة ماتولع بجاز ؟ لكن ساعتها سيقوم السلفيون بحرب ضروس مطالبين بقتلها كحد للردة و انا لم أسمع بوجود حد للردة .

فكريا ً انا متفق مع السلفيين فى النقطة دى لإن الأديان ليست رجعية بمعنى أن اليهودى ممكن يدخل فى المسيحية او الإسلام و المسيحى ممكن يدخل فى الإسلام لكننا عمرنا ما سمعنا فى اى بقعة فى العالم إن مسيحى اعتنق اليهودية و بالتالى ما ينفعش مسلم يدخل المسيحية او اليهودية .



شعب الكنيسة



البابا دايما ً بيصرح انه مهتم بشعبه على حد تعبيره ، طب الأرقام الرسمية الموثقة إن فيه 380 ألف حالة مسيحية فى المحاكم عشان مافيش طلاق فى المسيحية و مافيش فى مصر زواج مدنى زى لبنان يعنى 380 ألف مسيحى و 380 ألف مسيحية و على الأقل 380 ألف طفل مسيحى بينهم اى على أقل تقدير هناك مليون مسيحى عندهم مشكلة ، طب ليه الكنيسة تزعل بقى لما حد يدخل فى الإسلام عشان يهرب من المأزق ده ما انتم ماشفتوش حل ، زى ما طرحت مريم نعوم القضية دى فى فيلم " واحد صفر " .



السلاح و الإحتجاز




مشكلتين ماحدش بيكلم عنهم و لما الدكتور العوا قال فيه سلاح فى الكنايس قامت عليه الدنيا مسلمين و مسيحيين و لم تقعد و لكن كل الشواهد بتقول عكس كده و فى إمبابة استمر تبادل إطلاق النار بين المسيحيين و قوات الجيش ساعة و نصف و أصيب عقيد جيش و هذا كان السبب الرئيسى فى نزول الفرقة 777 صاعقة امبابة و تحولها لثكنة عسكرية ، كما أن الإحتجاز أصبح شئ ثابت و لا نقول تعذيب مثلما يهرطق السلفيون فهى كنيسة و ليست سلخانة لأمن الدولة الثابت أن هناك إحتجاز و عمليات غسيل مخ و لكن ليس هناك تعذيب او ضغوط بدنية ، أين هيبة الدولة أين الدولة المدنية التى ندعو لها و الكنيسة أصبحت حزب سياسى و سلطة داخل الدولة ، عبير إتصل بها محمود سعد امبارح و من قبله رئيس مباحث العاصمة دون أن تصرح بمكانها فهى فى حالة رعب شديد من الفريقين المسلمين و المسيحيين فلقد دخلت امبابة و هى منطقة عادية و خرجت منها و هى قطعة من اسبانيا أيام الجنرال فرانكو !!



وزارة الداخلية استعوضنا ربنا فيها لازم الجيش يتصرف و يشد الأطراف كلها السلفيون و الكنيسة و العفاريت اللى بيلعبوا بالإتنين ، لازم الجيش يجهز على ملف المسلمين الجدد و حسام ابو البخارى و لازم ينهينا من الكنيسة و رجالاتها و يدور ورا اللى بيحرك الإتنين زى عرايس المانيويت .



ربنا يعدى الأيام الجاية على خير و يساعدنا نعدى بمصر .