قولوا لأ للى باع و اللى لسة حايبيع

فاكرين هذه الجملة البديعة اللى ختم بيها الفنان العظيم محمد صبحى مسرحيته" كارمن"التى عالجت موضوع الدكتاتورية و التسلط بمنتهى الحنكة والمهارة كم واحد غيره قعد يهاتى ويطالب بأن تقول الناس لأ يا جماعة قولوا لأ واجركم على الله كل المطلوب من المصريين الآن-بعد ما وصلوه من حالة مزرية-يقولوا لأ.. لأقوية و حازمة وصريحة يا جماعة دى قولة حق عند سلطان جائر فما بالكم انه مش جائر وظالم بس لأكمان طاغية ومستبد فرعون حقيقى اقوى واكثر جبروتا من اى فرعون حكم مصر النمروذ وبختنصر ويوسف بن شرحبيل(بتاع اصحاب الاخدود)وجالوت وهتلر وهملر وموسيلينى وستالين تلاميذ عنده فى ابتدائى ده مش مدعاة اننا نخاف بالعكس ده مدعاة اننا نقف فى وجه النظام الغاشم والحاكم المتسلط باصرار اعظم سيقتلنا (مش حاقولكم يعتقلنا ويعذبنا)وماله لما نموت من اجل ولادنا وماله لما نموت من اجل بكره ولكن اؤكد لكم انه عمره ما حيحصل موت مش لاننا عمرنا ما حانقول لأ فانا لسه عندى امل(ولو انه ضعيف)ولكن لان النظام جبان متخفى وراء آلتيه البوليسية والعسكرية واللتان ستتخليان عنه فى سرعة البرق بمجرد ان يروا الشعب واقف وقفة واحدة فى وجه الطاغوت
قولوا لأ للى باع واللى لسه حيبيع بتلخص حالتنا و وضعنا البيع فى مصر بقى معنوى و حسى معنويا النظام باع الكرامة و العزة والمكانة معنويا النظام باع دم الشهدا على طول تاريخ الصراع العربى الاسرائيلى معنويا النظام باع الذمة والضمير حسيا النظام بيبيع مصر حتة حتة سبحان الله الدنيا كلها عندها اجندات للتنمية المستدامة واحنا عندنا اجندات لبيع مصر فى المزاد العلنى يا ناس قولوا الله يرضى عليكم
انتو ماسمعتوش منير وهو بيصرخ فى حدوتة مصرية(مين اللى بيبيع الضمير ويشترى بيه الدمار)وصرخ وقال برضه(مين اللى ما يعرفش غير كلمة نعم)ده احنا وصلنا لمرحلة ما بعد نعم مرحلة الصمت المطبق ضرب واهانة وذل وبلطجة وتحرش واغتصاب وما فيش حد بيتكلم بطالة وفقر وغلا فى كل الاسعار ماعدا اسعار البنى آدميين هى بس اللى بترخص وما فيش حد بيتكلم تعليم زى الزفت وصحة فى النازل وما فيش حد بيتكلم كل الرموز بتنضرب قضاة وعلماء واجلاء وما فيش حد بيتكلم ايه اللى ممكن بعد كده يخلى الناس تتكلم يا ناس قولوا لأ ولو لمرة واحدة فى حياتكم لأن اللى باعكوا بالرخيص لسه حيبيع ولادكو بالارخص و لسه حيبيع حاجات تانية كتير

نقلا ً عن مدونتى القديمة " الفرسان " ديسمبر 2006

قال ايه مهندس زراعى

قولنا حانبنى و ادينا بنينا السد العالى و عايزينها تبقى خضرا الارض اللى فى الصحرا وفدادين خمسة خمس فدادين لاجار ولا دين و القمح الليلة ليلة عيده يا رب تبارك و تزيده وسر الارض ويا بسمهندز يا بسمهندز الدودة وكلت الدرة وكل!المهندس الزراعى من المهن التى تنحدر بل و تنقرض بزيادة تزفت حال مصر فقديما جدا القرى كانت تحتوى على اربع مدنيين هم الكل فى الكل هم الطبيب و المعلم ومهندس الرى والمهندس الزراعى بالاضافة الى عناصر الشرطة بعد ذلك العصر لم يتبق للزراعيين سوى اراضى الاستصلاح التى توزع عليهم و هو العصر العبقرى الذى الذى كانت توزع فيه الاراضى على كل الخريجيين بلا استثناءات وبعديه عصر التطبيع الزراعى مع اسرائيل الذى بغلطة عمر السادات عندما اعطاهم بذور جيزة70اجود انواع القطن فى العالم و اطول تيلة واصبح هناك فى بورصة القطن العالمية جيزة 70 ازرائيلين زى ما فيه جيزة 70ايجبشن وطبعا الغربى حيفضل الازرائيلين لأن العرب جرب ثم بتتويج فرعون عرش مصر ولى عزيز مصر على خزائن الارض يوسف باشا والى اللى ساعد اسرائيل و فداها بالروح وبالدم فاستورد منها الخبراء و نظم الرى الحديثة و اصناف الخوخ و الكانتالوب وبالمرة نخلى سيناء كلها قنب هندى وخشخاش يعنى احنا بنزرع منذ فجر التاريخ و دلوقت جايبيين اللى يزرع لنا لأ ومين اسرائيل يعنى جينا جنب ... القرد وبنشم!و بقى كل امل المهندس الزراعى انه يسافر اسرائيل ما تقولش حيسافر اوروبا ولا استراليا يا خويا يلعن ابو دى شغلانة اللى تخلينى اتعامل مع عدوى الى ان جاء ازهى عصور المهلبية والانطلاقة الثانية اللى فشخت الشعب المصرى و داست عليه وده عصر لم نعد نزرع فيه اصلا فكثرت علينا دعاوى عدم زراعة القصب خالص تحت مزعم انه عناصر مطلوبة امنيا-جامدة الجملة الاخيرة دى-لأنكم زى ما انتم عارفين البلد ماشية بنظام صباعى اللى بيوجعنى اقطعه( بدل ما اعالجه)لذلك عنما فشلنا فى الاقتصاد لغينا وزارة الاقتصاد, وكمان بيطالبوا بتقليل زراعة الارز اهم صادراتنا الزراعية واللى مش باقيلنا غيره بعد ما اوروبا زهقت من وش اهلنا ز مش عاوزه مننا اى بطاطس وكمان نستورد القمح و رجل شريف محترم زى م.ز/احمد الليثى طردوه شر طردة لانه وصل بالاكتفاء الذاتى من القمح 60%وقال ادونى كمان سنة او اتنين بالكتير و اوصل بالاكتفاء 100%ورفض التعاون مع مجلس القمح الامريكى فقالوا له بررررررره!وجابوا بداله بلوتين من بلاوى الزمن واحد اسمه امين اباظة(عار على الاباظية كلهم)و التانى اسمه على المصيلحى الاولانى مسكوه وزير زراعة رغم انه مش زراعى فقط عضو فى مجلس ادارة شركة النيل للاقطان و رئيس مصدرى الاقطان و التانى وزير حاجة مايعة كده اسمها التضامن الاجتماعى ضربوا فيها فى الخلاط التموين والشؤون الاجتماعية و العلاقة وثيقة طبعا !آخر مصائب الاولانى سرقة القطن من فلاحى البحيرة الغلابة دون ان يدفع ثمنه (عن طريق شركة النيل)والتانى من كتر مصايبه مش عارف اعدها و مش ملاحقها بس منها الغاء توريد الذرة للوزارة ثم الغاء توريد القمح-بالمرة-طب نزرع ايه يا جماعة يقولك ازرع نباتات زينة و نباتات طبية و عطرية آآآآآآآآآآآآه يعنى يا باشا نقضيها ياسمين و فل نسرح بيهم فى اشارات المرور وكركديه و شطة و شيح وتبقى البلد كلها عطارين و بالمرة ننفذ مشروع عود بخور و رقوة لكل مواطن!

نقلا ً عن مدونتى القديمة الفرسان ديسمبر 2006

ما القضية ؟

يا حكيم القوم قل لى ما القضية

هل أصاب بالقوم سهم أم بلية

كيف صار العرش فينا و الرعية

كلنا قد صار عبدا ً أو مطيه

-----------------------------

يا حكيم القوم قل لى هل خدعنا

يا حكيم القوم قل لى كيف ضعنا

كيف صار الصبر قهرا ً؟ كم أطعنا

كيف ضاع الحق فينا

و الحمية ؟

------------------------------

عرضنا أضحى مباحاً

صوتنا أمسى نباحاً

أرضنا ... مجدنا ... كلنا

قد لاذ خوفاً

و البقية

يا حكيم القوم قل لى ما القضية ؟

يا حكيم القوم قل لى كيف كنا

يا حكيم القوم قل كيف صرنا

رمزنا قد غاب عنا

و المعانى و الأمانى

غاليا ً قد ضاع منا

و المعية

يا حكيم القوم قل لى ما القضية؟

-------------------------------

يا حكيم القوم قل لى كيف صالوا

يا حكيم القوم قل لى كيف جالوا

كيف طال السيف منا نحرنا

كيف نال السهم منا قدسنا

كيف غالوا و احتملنا

كيف مالوا و انكسرنا

كيف بالوا فوق أجداث أبيه

يا حكيم القوم قل لى ما القضية ؟

-------------------------------

يا حكيم القوم قل لى .... هل فتنا

يا حكيم القوم قل لى .... هل جننا

كيف صار الأخ فخاً

كيف صار الذل فجراً

كيف شاع الحمق فينا و الدنية

يا حكيم القوم قل لى ما القضية ؟

---------------------------------

يا حكيم القوم قل لى من تراهم

يا حكيم القوم آه من خطاهم

قد أباحوا و استباحوا

كيف غالوا الشمس و استلبوا البرية

يا حكيم القوم قل ما القضية ؟

----------------------------------

يا حكيم القوم قل لى من ترانا

يا حكيم القوم قل لى ما دهانا

قد شربنا الكأس مراً و الثمالة

هل سئمنا الرشد حبا ً فى الضلالة

هل قنعنا بالمهانة و الزرية

يا حكيم القوم قل ما القضية ؟

شعر فاروق سالم

نقلا ً عن مجلة ضاد ( الصادرة عن إتحاد كتاب مصر ) العدد السادس أبريل 2007

الحقيقة

إتولدت بحب الحقيقة
و عشت بيها
و إتعلمت إنها مش ورا كل الوشوش البريئة
الكدب بس هو اللى بيبقى ماليها
و إتعودت ما قلش غيرها
بس للأسف ما تعودتش أحارب عشانها
مش لأن حاشيتى رقيقة
أو لأنى ما عرفش السكك الجريئة
يمكن لأن الخوف عرف يوصل لقلبى بأكتر من طريقة
أو لإن أصلى واحد من أطيب الخليقة
بس السبب الأساسى
إصرارى على إنى أبقى إنسان
و بلدى نظامه بالجزمة
اول ما يشوف اى لمة
او يعرف أنه فى حد فى سبيله لكشف الغـُمة
أو حد ينور الضلمة
العتمة
او حتى يحاول بالكلمة
يمكن تتغير على إيده الأمة
لكن هيهات النظام واقف له على الإمَـة
ناوى يضرب و يطحن بكل همة
بقى بالذمة
دى تبقى عيشة مهمة
بس ماتنازلتش عنها
الحقيقة
علشان كده مالقيتش غيره
أمشى فى ديله
الصبر
مشيت كتير ؟
سنين
لحد ما هو اللى زهق
و قال لى إصحى بقى البلد غريقة
و رحل عنى
جريت وراه و إترجيته يستنى و لو دقيقة
رفض و سابنى
وحدانى
بس انا اللى أستاهل لإنى من الأول ... أنانى


مــحــمــد يــاســر بــكــر

نظام الحلاقين !!!!!!!

تسمحوا لى أكتب بالعامية لأول مرة فى المدونة و تسمحوا لى أسوق فيها و نصبح على كل الحلاقين يعنى الناس اللى مابتتعاملش إلا بالأمواس و المقصات مرة و اتنين و تلاتة و طول ما الفرح شغال !!!!!!!!!
بالصلاة على النبى أصل الموضوع اللى حاكلم فيه ( ذو نزعة حلاقية ) !!!!!!
طبعا ما حدش فاهم حاجة خالص ، أنا ناويت أتكلم عن أسلوب عمل الإدارة المصرية و لقيت أن العلاقة ما بين الإدارة المصرية و الحلاقين علاقة متينة جدا !!!!!!
ما تفهمش بقى الناس فى الإدارة المصرية و الحزن الحاكم كان أصلهم حلاقين و لا إيه و لا يمكن مهنة أهاليهم و هما متأثرين بيهم ... والواد طالع لأبوه !!!!!!!
النظرية الأولى : درج لى القفى و طول لى القطتات !!!!!!
طبعا ً انتوا عارفين من زمان أن الإصلاح فى مصر تاتا خطى العتبة و إلا بخخخ ... و يجيلنا هارد اتاك ! و انتوا عارفين اد ايه النظام بيخاف علينا و قلبه علينا قويييييييى و لذلك يجب أن ندرج القفى ! قصدى الإصلاح مرحلة مرحلة و ياريت نطول القطتات قصدى مراحل الإصلاح يعنى عشرية عشرينية و ياريت ياريت تكون خمسينية تبقى فل قوى مش جمال مبارك كان بيكلم عن مصر 2050 ربنا يديلوه طولة العمر !
النظرية الثانية : الكل عند الحلاق بيطاطى !!!!!!
دى شعار المرحلة الحالية و القادمة بإذن الله فيه حقوق مواطنة يا جماعة الكل يضرب بالجزمة دكتور .. مهندس .. صحفى .. محامى .. قاضى .. طالب .. عامل .. صايع الكل يطاطى ما فيش فى كده كلام و بعدين ما تنسوش لما محمد صبحى سأل فى الكرنك سؤاله الهوميرى الشهير ( انا عاوز أعرف إيه اللى بيحصل فى البلد بالضبط ) كان الجواب كف عباسى على قفاه و جملة ( هى كانت بلد ابوك ) طبعا ً هى مش بلدنا و بلدنا يعنى أنت قصدك إيه يعنى مصر بقت بلدين و احدة بتاعة شعار بلدنا بتتقدم بينا و دى بتاعتهم بدون ذكر أسماء أقولها و انا باتف فى عبى و أقول حابس حابس بسم الله الرحمن الرحيم ربنا يجعل كلامنا خفيف عليهم ! و دى زى ما قال خالد توفيق من وجهة نظرهم يوتوبيا و من وجهة نظرنا مستعمرة اللصوص ، احنا مين ؟ احنا اللى سمانا بلال فضل سكان مصر الأصليون اللى بندعى ربنا كل يوم ما نبقاش هنود حمر تتم ابادتنا فبعد أن فشلت الجهود المستميتة فى القضاء علينا بالعبارات و القطارات و الحرائق و كافة الكوارث الطبيعية اختاروا لنا طريقة ابادة ابطأ و أفظع ... الموت جوعا ً
النظرية الثالثة : الراس بعشرة جنيه !!!!!!!!
فى الصالونات الكبيرة حجما ً و ليس مقاما ً نلاقى حوالى 6 او 7 كراسى و كاشير يحاسب بالراس عالطول من أصغر طفل إلى أكبر شيخ زمان كانت الراس بخمسة دلوقت بعشرة !
الإدارة المصرية بتتعامل بنفس الطريقة الراس ليها تمن زى ماقال كده عمرو أديب ايام العبارة تمنه كام يعنى خلصنى ؟النظرية الرابعة : الحلاق بيضحك على الأقرع بطقطقة المقص !!!!!!!!!

محمد ياسر بكر

دايرة الرحلة

غناء :- أحمد منيب
كلمات :- ياسر أبو النصر
ألحان :- أحمد منيب

إتكلمى

و ليه تسكتى زمن ..... إتكلمى
ليه تدفعى وحدك التمن ..... إتكلمى
و تنامى ليه تحت الليالى ..... إتكلمى
المشربية عيونك بتحكى عاللى خانوكى
و اللى سنين هاملوكى
جوة الببان سلسلوكى
و ليه تسكتى زمن ..... إتكلمى
ليه تدفعى وحدك التمن ..... إتكلمى
و تنامى ليه تحت الليالى ..... إتكلمى
المشربية عيونك بتحكى على خلق ولت
سهرت
صلت
و علت
فى الصخر شقت ما كلت
انا ابن كل اللى صانك رمسيس و أحمس و مينا
كل اللى زرعوا فى وادينا
حكمة تضلل علينا
و ليه تسكتى زمن ..... .إتكلمى
ليه تدفعى وحدك التمن ..... إتكلمى
و تنامى ليه تحت الليالى ..... إتكلمى


غناء : - محمد منير

شريط أخبار

وسط روائح الفساد التى ملأت البلاد و أزكمت الأنوف حتى أذهبت حاسة الشم نفسها و امام نظام شديد الغشم و الغباء يطيح بكل من لا يعجبه و امام تيار شديد العنف من المؤامرات - الفكرية و السياسية و الأخلاقية و الإجتماعية و المجتمعية و العقائدية - من الداخل قبل الخارج تخيلت أنى أفتح التلفزيون لأشاهد قناة حكومية مصرية و أرى فيها شريط الأخبار هذا و الذى يمثل جزء مما أحلم به لمستقبل بلدى الحبيب مصر و الذى تعلمت منذ نعومة أظفارى أن أحبه على يد أستاذ جليل بعيدا عن الشعارات و الأغانى الكاذبة و شريط الأخبار هذا ظهوره من الأساس على قناة حكومية يمثل قمة الحرية التى أتمناها لبلدى مصر



محكمة شمال القاهرة تقضى ببراءة السيد الرئيس من التهم المنسوبة إليه فى قضية المواطن السيد عبد العاطى خليفة * مصر * السيد رئيس الوزراء يجتمع بالهيئة العليا لحزب الرشد الإجتماعى برئاسة الدكتور متولى راغب نائب رئيس الحزب للنظر فى ما تم إنجازه العام الماضى و ما ينتظر الحكومة العام القادم بناء على البرنامج المقدم من الحزب * مصر * فوز السيد محمود عبد الرحمن بمقعد رئيس حزب النصر التنموى فى إطار الإنتخابات الداخلية للحزب * مصر * إستمرار المناظرة الفكرية و الحقوقية بين حزب الأخوة الديمقراطى الإسلامى و مجموعة المحبة المسيحية فى مكتبة الإسكندرية و كانت آخر اللقاءات بين السيد منصور الدمرداش عن الحزب و الدكتور فوزى لوقا عن المجموعة * مصر * وزارة الخارجية تصدر بيانا ً رسميا ًشديد اللهجة تحذر فيه الإدارة الأمريكية من تكرار إساءة تعاملها للمراسلين الإعلاميين المصريين بعد الجلسة المكثفة التى عقدها نقيب الصحفيين مع وزيرى الإعلام و الخارجية * مصر * وزيرى الداخلية و العدل الفرنسيين يلتقيان بالسيد محمد عبد العزيز رئيس المركز العربى لحقوق الإنسان فى إطار المؤتمر العام للمركز الذى ينعقد خلال شهر نوفمبر الجارى تحت عنوان " آلية تطبيق حقوق الإنسان فى المجتمعات ذات الطابع المؤسسى " بعدها سيلتقى وزير الداخلية بنظيره المصرى بينما يعود الآخر لبلاده * مصر * مفتى الديار المصرية يصدر فتوى رسمية بعدم تعامل المسلمين مع إسرائيل باى صورة من الصور و إلا أ ُعد ذلك خيانة لله و رسوله و للمسلمين * مصر * مؤسسة الرئاسة ترفض إستقبال مستشار الأمن القومى الأمريكى الذى مكث لبضع ساعات فى السفارة الأمريكية ثم غادر البلاد لإستكمال جولته فى المنطقة * مصر * جامعة القاهرة تكرم العالم اليابانى كوشوما إيهو و تقلده نوط الجامعة و درعها فى حفل كبير حضره كوكبة من علماء جامعات القاهرة و الإسكندرية و أسيوط و المنصورة و عين شمس بعد التعاون المثمر بينه و بين هيئة الطاقة النووية المصرية * مصر * اليوم الساعة السابعة مساءا ً على قناة البرلمان بث مباشر من مجلس الشعب لنقل وقائع الجلسة الأخيرة من مناقشة مشروع قانون الإستثمارات الجديد المقدم من الحزب المصرى الليبرالى الديمقراطى * مصر * و على قناة الأدبية الليلة العالم الكبير إبراهيم نصير أستاذ تاريخ الحضارات بجامعة عين شمس فى اللقاء العلمى المثير مع العالم الألمانى تشاكر هانز * مصر *

مشيت فى سكة

مشيت فى سكة غيرت حتى ملامحك

و آديك بتندم ليه عاوزنى أداوى جرحك

آكيد بتحلم لو فاكرنى فى يوم حاسامحك

فى يوم حاسامحك

و قلبى اللى إنكسر و أنت بتهدم كل حلم إتحقق

راجع لى ... راجع لى تفتكر إنسان زمان علم عيونك تعشق

قلبى اللى سبته بيغرق / فى عز الليل جريح

ده كان قرب يصدق / إن الدنيا بصحيح

فيها ملايكة ايام ما كان عايش لفرحك

و قلبى اللى إنكسر و أنت بتهدم كل حلم إتحقق

راجع لى ... راجع لى تفتكر إنسان زمان علم عيونك تعشق

مشيت فى سكة من بعيد نورها بيخدع

نسيت حبيبك سيبتنى ما ردتش تسمع

و جيت بتبكى بعد إيه ؟ ده ما عادش ينفع

ما عادش ينفع

و قلبى اللى إنكسر و أنت بتهدم كل حلم إتحقق

راجع لى ... راجع لى تفتكر إنسان زمان علم عيونك تعشق

فاكر و انا جاى أعاتبك / و بانادى عليك بشوق

بسهولة رد قلبك / قال لى إنسانى و فوق

وفر دموعك

وفر دموعك

ما هو مستحيل ابدا ً حانرجع

غناء :- أكـــمـــل

قولوا لأ للى باع و اللى لسه حايبيع

- قتلت كريمة
- لأ انا قتلت كارمن
- كارمن هى كريمة الإتنين واحد
- انا قتلتها لأنها كانت لا زم تموت
- الديكتاتور اللى زيك هو اللى لازم يموت
- وانا مين عشان أموت ؟
ده انا ما فيش فى ايدى كرباج و لا نبوت
ده انا ديكتاتور صغير يدوب لسه فى حضانة
باتهجى اول حروفى فى القهر و الإهانة
من كتر خوفى من خوف ابن الجبانة
الكذب و الخيانة
قلت أعمل ديكتاتور و لو انى لسه لى كتير عشان أكمل علام و آخد فى ايدى الشهادة شهادة الديكتاتوراه
و ألعب لعب الحواة
و أفسد الحياة
و أدوس على الجباه
و أشعلل الحرايق
و أظلم الخلايق
و أطيح فى خلق الله
- كارمن هى اللى حرة و انا اللى ديكتاتور .... و انتوا عايشين كمالة ؟ و لا عايشين عوالة ؟ و لا كمالة الطابور ؟
- كارمن رمز الحياة و انا اللى شرير و قاتل .... الدنيا من البداية محترفة فى صناعة الشخص الديكتاتور من يوم بدء الخليقة
مش قادرة تحمى حق و لا قادرة ترد ظلم و لا قادرة على الحقيقة
و لا تمنع ديكتاتور من كل صنف و لون من قهره للعباد
تعالوا نشوف و نقرا فى كتاب الإنسانية
أنواع مالهاش نهاية
من الديكتاتورية
فيه ديكتاتور سياسى و ديكتاتور حماسى
فيه ديكتاتور قرارى وفيه ديكتاتور حرارى
ديكتاتور فظيع و ديكتاتور وضيع و ديكتاتور رقيع
فيه ديكتاتور ذكى و فيه ديكتاتور غبى
و ديكتاتور عبيط و ديكتاتور حويط و ديكتاتور أليط
فيه ديكتاتور مهزء و فيه ديكتاتور ملزق
ديكتاتور شقى و ديكتاتور عفى و ديكتاتور عجوز
فيه ديكتاتور شجاع و فيه ديكتاتور جبان
و ديكتاتور زمان
غير ديكتاتور الزمان ده
الديكتاتور زمان كان زى جنكيز خان و هولاكو و هتلر و موسولينى
الديكتاتور معشش فى وجدان التاريخ .... فى قلب الإنسانية
و كل واحد فينا جواه ديكتاتور
بصوا على اى حد و حاتلاقوه
موجود اهوه
تحت جلده
بقايا الديكتاتورية
- انا عشقت كارمن ... لحن الحياة و الحرية الطليقة
و الأغنية البريئة
بتهرب من اسنانى لنياب الأولانى ... لمخالب ديناصور
سايبين الكون بحاله
بظلمه و بظلامه
و جايين عليا انا و تقولوا عليا ديكتاتور و ظلمت الإنسانية
و كارمن النبيلة
ضحيتى الجميلة
قتلتها ؟
- ايوه قتلتها .... ايوه قتلت كارمن ، و كريمة هى كارمن مافيش اى فرق كارمن قالت لى لأ و كريمة كمان قالتها
وانا ناويت ليلتها
أقتل البنت دية
قتل مالوهش دية
يعنى أقتل الحرية
أيوه قتلتها .... طب انتوا عملتوا إيه ؟
ساكتين من بدرى ليه ؟
ما قلتوش لأ ليه ؟
عشان ما بتقولوش
طلع لنا قراقوش
و ميت عفراكوش
ده غير اللى ما نعرفوش
من كل شكل ولون
بالذمة انا ابقى مين ؟
انا ابقى مين فى وسط دول ؟
ده انا ديكتاتور لسه بلية عند معلم كبير بيأمرنى أنفذ ... و انتوا ..... اهو ساكتين
ده انا بتلكك بيكوا
و اتعكز عليكوا
و عشمان لسه فيكوا
تقولوا لأ
نفسى مرة أسمعكوا تقولوا لأ
قوية
للديكتاتور إياه الكبير
قولوا لأ
و انا معاكوا
قولوا لأ للأمريكان و للصهاينة و لعنف الإحتلال
قولوا لأ لكوبنهاجن و بنى الذل و الهوان
و بلاش نفاق
قولوا لأ للى حاصل فى الخليج و فى العراق
قولوا لأ للمدابح فى جنوب لبنان
قولوا لأ
أقفوا مع كل ثائر فى القدس و الجولان
قاطعوا فى يوم البضائع
و الوجبات السريعة
و إفساد الطبيعة
أصرخ
أصرخ بعزم صوتك
و انا حاقول معاك
قولوا لأ للحروب
قولوا لأ للمجاعة
قولوا لأ للتآمر
قولوا لأ للخيانة
قولوا لأ للخنوع
قولوا لأ للخداع
قولوا لأ للى باع و اللى لسه حايبيع
قولوا لأ و السلام

مسلسلات رمضان :- سلطان الغرام

مسلسل سلطان الغرام بطولة أحد أعلام الجيل الجديد من الممثلين هو القدير خالد صالح الذى لم يعرف البطولة المطلقة إلا أن تخطى عمره الأربعون بسنوات قليلة و نحن فى هذه المساحة المحدودة لسنا بصدد التعرض لمشواره الفنى الطويل جدا ً بدءا ً من مسرح الهناجر مرورا ً بكل أدوراه الصغير منها و الكبير و حتى البطولة التى يستحقها عن جدارة
المسلسل من إخراج شرين عادل و التى تفوقت على أستاذها مجدى أبو عميرة و قدمت دراما تلفزيونية شديدة الثراء و الجدية وقفت بها فى الصف الأول مع الدراما السورية فالمسلسل هو أنجح مسلسل إجتماعى على مستوى كافة المسلسلات المصرية الإجتماعية هذا العام و قدمت بإقتدار مسلسل واقعى من تأليف السيناريست محمد أشرف و الذى أثبت هذا العام مقدرة عالية على الكتابة التلفزيونية الدرامية الناجحة بعد أعماله النصف ناجحة فى السنوات السابقة و أكد خالد صالح أن الجيل الجديد من الممثلين هو وحده الذى يملك الصدارة الآن بعيدا ً عن نجوم التلفزيون الكبار الذين تقل أعمالهم جودة كل عام عن العام الذى يسبقه و نجوم السينما القدامى الذين تركوا السينما رغما ً عنهم أمام رغبة المنتجين المتسلطين و هاجروا إلى التلفزيون ليقدموا أعمال شديدة الرداءة يسيئوا بها إلى أنفسهم قبل أن يسيئوا إلى الدراما المصرية فقط ليثبتوا أنهم موجودين
جمعت شرين عادل إلى جوار خالد صالح كوكبة من النجوم ، الكبار منهم أخرجوا جل طاقاتهم عندما رأوا أن العمل يستحق وعلى رأس هؤلاء الكبار المبدع السيد راضى و الفنانة الجميلة القديرة المتمكنة إلى أبعد الحدود خيرية أحمد ثم يأتى بعدهم فى مرتبة منفردة الفنانة لوسى الذى ترددت فى الماضى ما بين التمثيل و الرقص الإستعراضى و الإباحى و الغناء لتقدم لأول مرة دور شديد الجدية و الإتقان - بالنسبة لتاريخها - بعدها يأتى عديد من نجوم التلفزيون كان أقدرهم مفيد عاشور يليه روجينا و كذلك كان منفردا النجم طارق لطفى الممثل الوحيد من بين جيله الذى يقتنع بموقعه كممثل ثانى محترف و لا يسعى ابدا ً إلى البطولة مثل كثير من نجوم الصف الثانى الراحلين أمثال إستيفان روستى و عبد السلام النابلسى و عبد المنعم إبراهيم ... إلخ ثم أحمد عزمى الممثل الشاب الذى تربى تلفزيونيا ً و سينمائيا ً على يد عديد من المخرجين العظماء ليقدم فى هذا المسلسل واحد من أجمل أدواره على الإطلاق و تمثيليا ً مايا نصرى تتقدم بشكل ملحوظ و ملفت و أخيرا ً رانيا يوسف فى أداء جاد لأول مرة بعيدا ً عن ملابسها العارية
محمد أشرف :- القصة الدرامية شديدة الحبكة بحوار عالى الجودة إفتقدناه منذ سنوات و تناول درامى واقعى شديد الجدية للشخص متعدد الزوجات بعيدا ً عن الأداء الصبيانى المراهق لنور الشريف فى الحاج متولى و التناول الكوميدى السخيف لهذه المسألة رسم محمد أشرف شخصية مصرية شديدة المصداقية للشخص متعدد الزيجات من كل الجوانب الفحولة الجنسية موروثة عن الأب المتعدد الزيجات بدوره و لكنها لا تظهر فى بداية الأمر إلى يبدأ الرجل فى الثراء بل و يتوافق معها الحب لأول مرة فالزيجة الأولى كانت تقليدية لبناء الأسرة و درء الشهوة فحسب ثم أتاه المال اللازم و الحب فكانت الزيجة الثانية و تتصاعد الفحولة و لأنه لا يريد إلا ( الحلال ) و لا يتمالك نفسه أمام الجديدة فيحاول أن يبعد كما بعد سابقا ً و لكن لا يستطيع فتكون الثالثة ... و القاضية
و على مستوى الخط الدرامى و العمرى إستطاع رسم قصة صعود بحنكة بالغة من تباع إلى سائق إلى مالك و زارع أراضى و رجل أعمال ... ثم السقوط
كانت القصة فى مجملها واقعية عاب عليها كثير من النقاد الآتى : 1 - تعدد الزوجات 2 - السذاجة فى كثير من الأحداث أولها طريقة الإيقاع بنورا فى أول المسلسل و آخرها سقوط سلطان الغير مبرر
هؤلاء النقاد لم يضعوا فى إعتبارهم أن شيرين عادل فى مهارة بالغة لم تضطر إلى التأريخ بالأرقام و إنما إعتمدت فى حرفية بالغة على الأغانى و الملابس و الديكور و طريقة الكلام و الأدوات فالقصة بدايتها وقعت تقريبا فى الستينيات او اوائل السبعينيات و الدليل على ذلك أغانى ليلى مراد و فريد الأطرش و نجاة الصغيرة و الملابس القديمة و طريقة التحدث ثم بدأ الحديث عن إستصلاح الصحراء و مشروع مبارك للخريجين فدخلنا بذلك الثمانينيات ثم قفز المسلسل إلى أواخر التسعينيات فى واقعة غير مسبوقة فى الدراما المصرية لمنع المط و التطويل فظهرت الملابس الحديثة و الهواتف المحمولة و الأغانى الجديدة و اللهجة الشبابية الجديدة
كما نجح محمد أشرف فى نسج قصة رومانسية جميلة بأغانى الموسيقار العظيم فريد الأطرش
شرين عادل:- نجحت أول ما نجحت فى الإدارة العمرية للممثلين فنرى المتألق خالد صالح فى أول المسلسل شابا ً فتيا ً يتقافز و يقوم بتحميل المقطورات بينما فى آخر المسلسل و قد بلغ من العمر مبلغه يسير منحنى الظهر و لايستطيع أن يرفع نفسه ربع متر ليجلس على مؤخرة السيارة و كذلك الأداء المذهل لخيرية أحمد عبر مراحل عمرية كثيرة و كذلك السيد راضى الذى قام بدور( الفحل المزواج ) بتمكن بليغ ثم العجوز الذى يبحث عن المتعة وكذلك لوسى بينما فشلت كل من مايا نصرى و روجينا و رانيا يوسف - بترتيب الفشل من الأفشل - فى إتقان التقدم فى العمر
قادت شرين عادل فريق عمل ممتاز من ديكوريست و مصورين و ممنترين و ممنتجين و مهندسى الصوت أظهروا العمل فى أبهى صورة له فصحبنا العمل عبر المكان و الزمان فى رحلة خلاقة من منزل فقير فى مطلع السبعينيات إلى منزل رجل أعمال فى بداية الألفينيات و التصوير عبر عديد من المناطق فى مصر و السرد البصرى لتباع ( ثم سائق ) يطوف و يزور كثير من المناطق
خالد صالح :- فنان عبقرى من مدرسة المشخصين و هى مدرسة رائدها الفنان الراحل أحمد زكى ، فتلبس خالد روح الشخصية و يلم بكل أبعادها و فى هذا العمل قدم التباع المخلص و لكنه ذكى و طموح لأبعد حد يندم فى كل يوم أنه لم يحصل سوى على الشهادة الإعدادية و أن الفاقة قد إضطرته إلى عدم إكمال تعليم ابنه الأكبر و دخل لعبة ( تسقيع ) الأراضى و زراعتها
و فى الجوانب الإنسانية تألق خالد فى الأداء ... أداء الزوج الفقير الذى يكابد فى الحياة لإسعاد زوجته و أولاده و أمه ثم الإخلاص لزوجته رغم زواجه التقليدى منها و يأتيه الحب فيهرب منه لذلك الإخلاص ثم الشهوة و تجاهل الزوجة لها فتكون الزيجة الثانية ثم تأتى الصدمة ثم التكيف مع تجمد الزيجة الأولى و رفض الطلاق فعلى حد تعبيره ( اللى أتجوزها تبقى تأممت ) ثم كان الصعود و معه الزيجة الثالثة رغبة ً فى إرضاء شهوته أكثر و طموحاته الإجتماعية و المادية التى لا تنتهى ثم السقوط ، اما عن الأداء العبقرى لعلاقته بإبنه الأكبر و بابيه ليكون الثلاثة حلقة متصلة فى غاية الصلابة و الحب و الإتصال تــُوجت هذه العلاقة بأداء عبقرى من خالد عندما دخل عليه ابنه و هو فى فراشه واجم و حزين و قال :- البقية فى حياتك فرد عليه بتوجم أكبر :- فى مين يا محمد ؟ فيرد عليه :- جدى فيذهبا ليرا جثمان الجد المسجى و يتألق خالد و هو يخاطب الجثمان ، و يؤدى بتمكن التقدم فى العمر و يشور على ابنه فى كل صغيرة و كبيرة فيختارا فى النهاية الأسرة على المال
السيد راضى كان أداءه يناسب تاريخه الطويل بأداء كوميدى يميزه و علاقته بابنه سلطان رائعة فهو يفضله على كافة أبناءه رغم أنه ليس أكبرهم
خيرية أحمد الأداء القوى طوال المسلسل و لم يضعف ابدا حتى مشهد إحتضارها المؤثر و نوم ابنها على صدرها الأكثر تأثيرا ً بل و تظل مؤثرة حتى بعد موتها بنصائحها الغالية
لوسى فى اول أدوراها الجادة ... زوجة فقيرة تساعد زوجها أتقنت لوسى الدور و لم يعبها سوى ( مسكنة ) غير لازمة و تكلف فى طريقة الكلام و قدمت بأداء ممتاز الزوجة التى تزوجت صغيرة السن ... يتيمة فنشأت فى كنف حماتها حتى غدت الأخيرة تدافع عنها و الأولى تناديها بـ ( يامه ) و رغم تكرار مشهد مواجهة الزوجة الأولى و الثانية فى الدراما المصرية إلا أن لوسى تجاوزت ذلك الإمتحان بنجاح
طارق لطفى مفاجئ كالعادة بأداء مبهر منقطع النظير بسلاسة مدهشة و كانت المشاهد التى تجمع بينه و بين خالد هى الأكثر حرفية بعد المشاهد التى تجمع بين خالد و السيد راضى
مايا نصرى تتقدم فى الأداء بشكل ملحوظ و إن لم تقدم دورها المعقد بكفاءة كاملة فلقد شاب أداءها بعض القصور و يحسب لها القيام بدور المرأة المتسلطة بنجاح كبير و قد إنتهى مثل هذه الأدوار بعد نهاية نادية الجندى او نبيلة عبيد السينمائية
أحمد عزمى الممثل الشاب الذى قدم العديد و العديد من الأدوار ترددت بين النجاح و الفشل و كان دوره فى هذا المسلسل هو الأنجح بعد دوره فى فيلم ( خريف آدم ) فلقد قدم كابن سلطان الأكبر أداءا ً جميلا ً لم تشبه اى شائبة و وقف امام قامات عليا مثل السيد راضى و خيرية أحمد بثبات مطلق

محمد ياسر بكر

مسلسلات رمضان

قدم صناع الدراما العربية لهذا العام عبر مختلف الشاشات و الفضائيات العربية 37 مسلسلا ًهم
الدالى -
عفريت القرش -
نافذة على العالم -
من أطلق الرصاص على هند علام ؟ -
قلب إمرأة -
إمرأة فوق العادة -
قضية رأى عام -
أولاد الليل -
تامر و شوقية ، الجزء الثانى -
خالد بن الوليد ، الجزء الثانى -
باب الحارة ، الجزء الثانى -
الإمام الشافعى -
سلطان الغرام -
حنان و حنين -
رجل غنى ... فقير جداً -
عائلة مجنونة جداً -
الملك فاروق -
حق مشروع -
أحلامك أوامر -
يتربى فى عزو -
المصراوية -
نقطة نظام -
عمارة يعقوبيان -
رجل و 6 ستات -
نمر بن عدوان -
رسائل الحب و الحرب -
أزهار -
الفريسة و الصياد -
عنترة -
أسياد المال -
غزلان فى غابة الذئاب -
على حافة الهاوية -
سقف العالم -
حصرم الشام -
ابو جعفر المنصور -

زمن الخوف -

للخطايا ثمن -
هذه هى كل مسلسلات رمضان بالطبع لم أشاهدها كلها بالكامل ، فمنها ما شاهدته بالكامل و منها ما شاهدت منه مقتطفات و منها ما شاهدت منه مشاهد معدودة و منها ما لم أشاهده و لكن حكى لى أحداثه بالتفصيل مشاهد آخر متابع او قرأت عنه . و لكن إذا تكلمنا بالإجمال عن مسلسلات رمضان سنقول الآتى :- للأسف مضطر أن أقسم الأعمال إلى قسمين كبار الدراما المصرية – الدراما العربية و التى تمثلها على وجه العموم الدراما السورية ، لا أتعمد إلى هذا التقسيم لمهاجمة الدراما السورية كما فعل كثير من النقاد الجهلاء بل لأن الدراما المصرية مازالت مليئة بالآفات التى لا يجب أن تختلط البتة مع الدراما السورية او العربية الأخرى ، و اول هذه الآفات بالطبع ما ذكره السوريون أنفسهم و بعض المصريين المنصفين أن الدراما المصرية منذ بداية التسعينيات بدأت موجة نسب المسلسل إلى نجمه الرئيسى فأصبحنا نقول :- مسلسل نور الشريف و مسلسل الفخرانى و مسلسل نبيلة عبيد و مسلسلة يسرا و مسلسل نادية الجندى و مسلسل .... إلخ و نسينا عصر المسلسلات العملاقة التى نحفظ أساميها عن ظهر قلب كــ شارع المواردى و المال و البنون و ابو العلا البشرى و العائلة و ذئاب الجبل و ليالى الحلمية .... إلخ و هذا هو سر نجاح الدراما السورية الآن .... العمل و ليس النجم فصرنا نسمع عن باب الحارة و ملوك الطوائف و الشتات و خالد بن الوليد .... إلخ
و الأكثر جهلا ً أن نعيب على السوريين الإستعانة بالإمكانيات الإمارتية و الأردنية و رأس المال الخليجى فلا يعيب ابدا الموهبة فقيرة المال أن تستعين بمن يساعدها على الصعود و الترقى مقابل جنى المال من وراءها و لكننا نسينا السنين الطوال التى كنا نستعين فيها بإستديوهات دبى لتصوير مسلسلاتنا قبل إنشاء مدينة الإنتاج الإعلامى

و على ذلك إذا بدأنا بالدراما المصرية و بالتقسيم الذى يفضله صناعها سنورد التحليل الآتى

الجيل القديم جدا

لبنى عبد العزيز فى ( عمارة يعقوبيان ) فى دور شديد الفشل هو دور دولت الدسوقى و هو دور لا يناسبها و هى فى ريعان شبابها و أوج مجدها فما بالك و هى الآن إمرأة درداء شمطاء و النجم العالمى عمر الشريف فى مسلسل ( حنان و حنين ) و أعاد معه صديق عمره أحمد رمزى و خيرية أحمد و راضى
الجيل القديم *

و على رأسه محمد صبحى و نور الشريف و نادية الجندى و كريمة مختار

و سأفرد لكل من ( رجل غنى ... فقير جداً ) و ( الدالى ) حديث منفصل اما نادية الجندى فهى كما هى ممثلة قمة فى العند و الغرور و الصلف و هذه الصفات هى التى جعلتها على رأس قائمة الممثلين الكبار الذين إعتزلوا السينما و إكتفوا بالتلفزيون فى سابقة لم تحدث فى العالم أجمع لأنها لا ترغب فى العمل مع اى ممثلين جدد كما أنها لا تريد التنازل عن لقب منحته لنفسها " نجمة الجماهير " و تصر عليه للعمل فى السينما و رغم أنها كانت أول نجمة شباك بالمعنى التجارى فى السينما المصرية إلا أنها فضلت التلفزيون لترضى هذا الغرور و الكبرياء اللعينان فى مسلسل (من أطلق الرصاص هلى هند علام ؟ ) تقوم بــ ( حشر ) نفسها فى قضية كبيرة ماتت مع موت البرنامج النووى المصرى و هى قضية إغتيال العلماء قامت بدورها بأداء باهت من نفس منطلق المرأة القوية الذى بات لا يناسب هذا العصر مع أداء عادى جدا ً لــ خالد زكى

جيل الوسط *

يأتى على رأسهم من حيث الأداءمن الأعلى إلى الأقل صلاح عبد الله و عبلة كامل و هشام سليم و سوسن بدر و صلاح السعدنى و فاروق الفيشاوى و حسين فهمى و يسرا و ممدوح عبد العيلم و يحيى الفخرانى و إبراهيم يسرى و سامى العدل و ماجدة زكى و إلهام شاهين و فيفى عبده و سماح أنور

الجيل الجديد *

للأسف لم يشارك عدد كبير من نجوم الجيل الجديد فى الأعمال التلفزيونية كالعام الماضى و فضل كثير منهم التوجه للإذاعة كــ أحمد حلمى فى المسلسل الإذاعى ( صلاح الخير ) و أحمد عز فى المسلسل الإذاعى ( عيد فى ريال مدريد ) و من حيث الأداء من الأعلى للأقل خالد صالح و لوسى و لقاء الخميسى و فتحى عبد الوهاب و رانيا فريد شوقى و أحمد الفيشاوى و مى كساب و أشرف عبد الباقى

الدراما السورية و العربية

يأتى على قمتها المسلسل الأنجح ( باب الحارة ) للعام الثانى على التوالى بنجاح ساحق و بطولة فذة للمثل القدير عباس النورى يليه المسلسل العربى ( الملك فاروق ) ثم بعض المسلسلات التى أثبتت نجاح كــ ( حصرم الشام ) و ( نمر بن عدوان ) و ( عنترة ) و لم يحقق ( خالد

بن الوليد ) فى جزءه الثانى نجاح العام الماضى لإسناد البطولة لغير بطل العام الماضى باسم ياخور و كان ( رسائل الحب و الحرب ) ايضا ً متفوقا ً و الباقى عادى لا يلفت الإنتباه

محمد ياسر بكر

فارس الكلمة الرخيصة

مسرحية سياسية لسمير غانم لهذه المسرحية قصة ، كان اسم المسرحية فى بادئ الأمر ( فارس بنى خيبان ) و المعنى واضح استيقظت مصر لتجد صور رئيس الجمهورية على الأفيش ملصوقة بدلا ً من صور سمير غانم بإعتباره (فارس بنى خيبان ) و سأترك لك مهمة البحث و التخمين من رئيس الجمهورية المقصود !!! و على الفور أمرت الرقابة بإضافة حرف واو العطف لتغيير المعنى و كل أفيش أصبح يحرسه جندى من الشرطة !!!! و أصبح اسم المسرحية ( فارس و بنى خيبان )
- انا الخير و هو الشر ... انا الإنسان و هو الحيوان
انا اول واحد قلت له فى وشه أنت فارس بنى خيبان
أنت فارس الكلمة الرخيصة اللى حروفها بتنقط نفاق و تزلف و استرزاق ، من يومين دخلت له المكتب فى الجورنال
ده جورنال يرضى ربنا ؟
الجورنال هو تاريخ الشعب اليومى .... ده منظر جريدة تشرف جيلنا ؟
يعنى احنا مثلا ً محتاجين الكلمات المتقاطعة اللى بتضيع وقت الموظفين ؟
محتاجين لحظك اليوم اللى كله كذب و دلع ؟
محتاجين لإعلانات النفاق و التأييد و الإثارة و التشهير بالناس و ولاد الناس ؟
محتاجين لمشاكل الفنانين و فضايحهم و راحوا فين و اجوزوا مين و ناويين يتعشوا فين بعد 4 سنين !!؟
يبقى فاضل إيه فى الجورنال ؟
مافيش غير الحاجة الوحيدة المكتوبة بصدق و أمانة .... الوفيات !!!
15 ألف جورنال و 20 ألف مجلة و كله بياخد من بعضه الفالح فيهم اللى بيكذب ...
تحت الوفيات أخبار الإذاعة و التلفزيون - أسعار العملة ... الدولار - الكوسة ... القلقاس
طب كلمة حق يا راجل عن سعر الناس
و كفاية - بينى و بينك - احنا فقدنا الرحمة و الإحساس
دى الزوجة بتخرط جوزها يا خلق .... و الواد قتل أمه و ابوه
مع إن الكلب ، الكلب بحق .... ماعضش ودن أخوه
و الأم بتدبح ابنها قال علشان بتحب
ده شئ ينقال ... ياعم جرى إيه فى الدنيا ؟
يعنى أسأل مين ؟ أسأل متقال ؟!!
طب إيه اللى بيحصل ده ؟ و اللى حصل ده فى لبنان ؟ و إيه اللى كان جرى بين العراق و إيران ؟
مش هبل ده و لا دى خيبة يا خلق ؟
ما يفوقوا ... يعقلوا
ده الكلب حتى الكلب ما عضش ودن أخوه
إذا كنا حانفضل على ده الحال
العيشة و الله حتبقى محال
و غطونى بقى فى الحال

عصفور المطر

غناء :- حنان ماضى
ألحان :- ياسر عبد الرحمن

التوعية و التعليم الزيجيين و الثقافة الأسرية

ظهر منذ عدة سنوات مصطلح ( الثقافة الجنسية ) و نادى بتطبيقه قوم من المصريين ( إعلاميون و أطباء و فنانين ... إلخ ) دون أن يوضح اى من هؤلاء  القوم  ما يعنيه بهذا  المصطلح او آلية او منهج لتطبيق هذا المصطلح النظرى إلى واقع عملى تناول بعد ذلك الموضوع الكثير من المثقفين و ذوى العلم و كذلك بعض الأعمال الفنية السينمائية اما بالموافقة او بالمهاجمة اما انا فسأتناوله بشكل علمى بحت
اولا ًماذا تعنى هذه الجملة ؟ هذه الجملة تعنى فى نظر بعض المنادين بها إلى تعليم الأمور الجنسية اما بشكل مطلق او فى مناهج التعليم المدرسى و من يدعو إلى هذا هو بلا أدنى شك داع ٍ إلى فجور و إباحية لا ريب فيهما ، هذا من منطلق اى مقياس أخلاقى لأى أمة من الأمم و اى شعب من الشعوب اما معنى الجملة لغويـــا ً فأكثر إبهاما ً و غموضا ً فالثقافة لدى العامة تعنى المخزون المعرفى لشخص ما و لدى العلماء خاصة علماء الإجتماع 
منهم تعنى العادات و التقاليد و الأعراف لمجتمع ما و التى يؤمن بها الفرد الذى يعيش بهذا المجتمع اما الشق الآخر من الجملة فيعنى الممارسات الزيجية العضوية
و المعنى فى كلتا الحالتين لدى العامة و الخاصة بل و خاصة الخاصة ينذر بالخطر لأنه فى الحالتين سيكون لدينا ممارسات يؤمن بها شخص ما تبعا ً  للعادات و التقاليد التى نشأ عليها او التى تلقاها تعليمياً او تربويا ً و كل هذه الحالات تحتمل فى جانب كبير منها السئ و الضار 
ثانيا ً:- لماذا أكتب فى هذا الموضوع ؟ أكتب للأسباب التالية 
إرتفاع معدل الطلاق بين الزيجات الحديثة بمصر
زيادة نسبة الأمراض الوراثية ( بغض النظر عن أن مصر تعج بالأمراض بشكل عام
غياب الأمن الإجتماعى كمنظومة شاملة و كاملة و ما يتضمن ذلك من تفكك أسرى لعدم إتفاق الزوجين و إختلافتهما و شجاراتهما الدائمة
بعد هذه التقدمة أشرح موضوعى ، انا لا أتفق البتة مع مصطلح ( الثقافة الجنسية ) لأنه مصطلح متخلف و رجعى اما مضمون ما يدعو إليه البعض تحت هذا المصطلح فايضا ًأرفضه لأنه إباحى .... حسنا ً إلى ماذا أسعى ؟ سأضع مصطلحات علمية ثم أشرحها
تعليم زيجى
توعية زيجية
ثقافة أسرية
اولا ُالتعليم الزيجى و التوعية الزيجية و أقصد بهما تعليم الشاب و الفتاة المقبلين على الزواج حقوق الزوجة على الزوج و حقوق الزوج 
على الزوجة و هذه الحقوق تشمل الحقوق المادية و المعنوية و النفسية و العضوية ( بترتيب الأهمية ) و ذلك من النواحى العقائدية و الأخلاقية و الإجتماعية و القانونية و الصحية
و كذلك طريقة التعامل بين الزوج و الزوجة و ذلك فن قلة هم من يلمون به و متطلبات الحياة الزوجية و التهيئة النفسية و البدنية لبدء حياة جديدة مع شخص جديد
بالطبع قد يعتبر البعض كل ذلك نوع من المبالغة و لكن ذلك لأنه من البداية نظام التعليم ما قبل الجامعى عندنا فى مصر فاشل فمعظم ما سبق قابل للتعلم فى الصغر ما عدا بالطبع الممارسات الزيجية 
العضوية ، إذن أين يمكن تعلم ذلك ؟ يجب أن يتم ذلك فى مراكز متخصصة تتبع المؤسسات الجامعية او مجموعة من الوزرات كالصحة
و السكان و الشئون الإجتماعية او التضامن الإجتماعى ... إلخ على يد نخبة من الأطباء و الإجتماعيين و الحقوقيين  
إذا إتفقنا على ما سبق يتبقى نقطة واحدة انا متأكد من ترددها فى أذهانكم ألا و هى الممارسات الزيجية العضوية ، قد يتساءل سائل و 
لماذا من الأساس يتم تعلم مثل هذه الأمور حتى و إن كان قبل الزواج فى مراكز متخصصة فذلك الأمر فطرى و ابى و امى لم يتعلماه 
حتى ينجبانى و كذلك جدى و جدتى لم يتعلماه لينجبا ابى و امى ... إلخ فلماذا يتم تعليمه أصلا ً ؟
سأرد على ذلك السائل بشكل علمى تماما ً ، الموضوع ليس إنجاب و حسب فنحن بشر و لسنا حيوانات لنا أحاسيس و مشاعر و عقل
لا نتناكح للتكاثر فحسب و إنما لإعتبارات أخرى كثيرة كما أن الفطرة تختلط فى كثير من الأحيان بالموروث الثقافى و ما قد يحمله من عادات
 سيئة و ربما ضارة كما أن المرء و خاصة فى مصر نجد أن مراجعه فى ذلك الأمر اما مرجع سماعى مستاق من خبرات الآخرين
و حكايات كالأساطير و اما مرجع شفهى من الرفقاء او الأسرة و كلاهما غير متخصص علميا ً و سأضرب مثلا ً يقرب الأمر إلى الأذهان
، لا يوجد شخص اى شخص لا يعرف محطة القطار فى بلده و إلا كان أبلها ً و لكن كم منا يعلم جميع مواعيد قيام و وصول القطارات
المختلفة و كم منا يلزمه فى كل مرة أن يسأل المسئول عن ذلك ؟
بقى أمر أخير إلا و هو الثقافة الأسرية و أقصد به الإهتمام بالأسرة المستقبلية بالكشف الطبى على الزوجين من الأمراض الوراثية خصوصا ًو
الأمراض الأخرى عموما ً فمن الظلم كل الظلم أن يتحمل أحد الزوجين المشاكل الصحية للزوج الآخر و تعليم الزوجة كيفية التعامل
مع الحمل الأول و كذلك تعليم الزوج كيفية تعامله مع زوجته الحامل و كيف يساعدها و كيف يستقبلا سويا ً اولى أطفالهما
بهذا التعليم الشامل نستطيع أن نعبر باى شخصين مقبلين على الزواج كل الحواجز و الحوائل الخطرة و نصل بهما زوجين سعيدين إلى بر الأمان
بدون مشاكل او أمراض او خلافات او اى سبب يؤدى إلى الطلاق فلقد فحصنا قبل الزواج كل أسباب التناقض و الخلاف و وصلنا
تقريبا ً إلى الإتفاق الكامل ليبدءا سويا ً حياة جديدة

مــحـــمــد يــاســر بــــــــكـــــــــر