لا عمرى حلمت أكون فارس
ولابقصر و عليه حارس
حلمت ألقى فى يوم مطرح
وفى جنة قلب بنوتة
تقوللى إن انا ليها
وأعيش من تانى فى عينيها
يروح الحزن و يسيبنى
و أعيش الحب حدوتة
كبير الحلم ده يعنى
و ليه القهر يمنعنى
بحايل بس مش راضى
يسيب لى حتى فتفوتة
حلمت بروحى دى حرة
و أيامنا ماهيش مرة
و باين كل أحلامى
حتفضل فيا مكبوتة
حلمت أفرح و ده حقى
اتارى الفرح متنقى
لناس تانية مانيش منها
غناوى الحب حابسينها
ده حتى بلدنا واخدينها
و اتارى الحلم كان طايش
بلدنا مش بلد طيب
و لا من جرحنا قريب
ما عادش ترابه فى الننى
و انا مش حابه إكمنى
قضيت كل اللى فات منى
مفكر إن انا عايش
واتارى الحلم كان طايش
شعر :- محمد الهنداوى
نقلا ً عن جريدة الدستور العدد 108
11 - 4 - 2007
23 - 3 - 1428
ليست هناك تعليقات:
إرسال تعليق